Wefdi Uu hugaaminayo Wasiirka Gaashan dhiga Oo Beydhabo Gaaray

Magalada Baydhabo ee Xarunta Gobolka Baay waxaa Maanta gaaray wafdi uu hoggaaminayo Wasiirka Wasaaradda Gaashaandhigga Xukuumadda Soomaaliya Xasan Cali Maxamed( Amar-dambe) iyada oo halkaasi siweyn loogu soo dhaweeyay.

Wasiirka ayaa waxaa uu kulan kula qaatay saraakiisha Ciidamada Xarunta taliska qeybta 60aad ee Ciidamada xoogga dalka Soomaaliyeed oo ku taalla Magalada Baydhabo ee Xarunta Gobolka Baay.

Taliyaha qeybta 60aad ee Ciidamada xoogga dalka Gaashaanle Sare Cabdiraxmaan Maxamed Cusmaan (Timacadde) ayaa sheegay in U jeedka Wasiirka uu u tegay Baydhabo ay tahay in uu tababar Maalinta berito ah uu u furi doono Ciidamo ka mid noqoanaya Millateriga Soomaaliya.

Dhinaca kale Wasiirka Wasaaradda Gaashaandhigga Xukuumadda Soomaaliya Xasan Cali Maxamed( Amar-dambe) ayaa ka mahad celiyay soo dhaweynta loo sameeyay,waxana uu sheegay in tababarkaas ay ka faa’iideysan doonaan Boqolaal askari oo ka mid noqon doona Ciidamada Dowladda Soomaaliya.

Sidoo kale Wasiirka ayaa waxaa uu hadalkiisa intaasi ku daray in Ciidankaas tababarkooda uu socon doono mudo laba Bilood ah,isla markaana loogu talo galay inay ka qeyb qaataan dagaalka ka dhanka ah Al-Shabaab ee ka socda deegaanada Koonfur Galbeed.