Xasan Cali Kheyre oo lakulmay Wasiirka arrimaha dibadda Norway

Gelinkii dambe ee Maanta ayay soo gaartay Magalada Muqdisho Wasiirka arrimaha dibadda Norway Marie Eriksen Søreide,waxaana Garoonka Diyaaradaha Muqdisho kusoo dhaweeyay Ra’iisul Wasaare ku-xigeenka dalka iyo qaar kamid ah golaha Wasiirrada Soomaaliya.

Wasiirka arrimaha dibadda Norway ayaa soo dhawaynta kadib, waxaa xafiiskiisa ku qaabilay Ra’iisul Wasaaraha xukuumadda federaalka Soomaaliya (XFS), mudane Xasan Cali Khayre.

Kulanka ay yeesheen Ra’iisul Wasaare Xasan Cali Khayre iyo Ine Marie Eriksen Søreide, ayaa looga hadlay xoojinta xariirka soo jireenka ah ee labada dowladood.

Ine Marie Eriksen Søreide oo Ra’iisul Wasaaraha uga mahad-celisay soo dhawaynta loo sameeyay, ayaa ammaantay horumarka muuqda ee Soomaaliya ay ku tillaabsatay, isbedellada iyo dib-u-habeynta ballaaran ee ay dawladda Soomaaliya ka waddo hay’adaha dowladda si dalku u gaaro dib-u-kabasho dhamays-tiran.

Norway ayaa qayb ka ah wadamada Soomaaliya ka taageera nabadayta, barnaamijyada horumarinta iyo bini’aadninimada.