Madaxweynaha Koonfur Galbeed Cabdicasiis Lafta-gareen ayaa la saftay madaxweyne Xasan Sheekh oo wajahaya mucaaradad xooggan oo la xiriirta arrimaha wax ka beddelka dastuurka.
Lafta-gareen oo khudbad ka jeediyay munaasabaddii caleemo saarka Saciid Deni ee shalay ka dhacday Garoowe ayaa sheegay in la joogo waqtigii la dhameystiri lahaa dastuurka oo muddo badan KMG ah.
Waxa uu intaas kusii daray “Arrinta dastuurka dhameystirkiisa iyo hore u socodka dowladnimada Soomaaliya aan dhiiri-gelino aan garab istaagno sida ay hadda wax ku socdaan. Siyaasiyiinta iyo dadka aragtiyada kala duwan maanta maalin ay ka munaasabsan tahay oo ay ka fiican tahay ma lahan.”
Sidoo kale waxa uu madaxweyne Xasan Sheekh iyo guddoomiyaha Golaha Shacabka Aadan Madoobe ku bogaadiyay wixii maalintii dhoweyd ka dhacay xarunta Baarlamaanka, ee lagu meel-mariyay habraaca wax ka beddelka dastuurka.
Hadalka Lafta-gareen ayaa imanaya xilli uu shalay madaxweyne Xasan Sheekh Maxamuud uu si cad u sheegay in aan dib looga laabaneyn dhameystirka dastuurka, islamarkaana uu taagan yahay waqtigii ugu munaasabsana ee la dhameystiri lahaa.