Ra’iisul Wasaaraha Xukuumadda Federaalka Soomaaliya, Mudane Xamsa Cabdi Barre, ayaa ka qeyb galay munaasabad uu xilka kula wareegay Agaasimaha Guud ee Hay’adda Socdaalka iyo Jinsiyadda, Mudane Mustaf Sheekh Cali Dhuxulow. Munaasabadda ayaa ka dhacday Xarunta Hay’adda ee magaalada Muqdisho. Mudane Mustaf Sheekh Cali Dhuxulow ayaa loo magacaabay xilkan, sida lagu sheegay qoraal ka soo baxay dowladda.
Mudane Mustaf Sheekh Cali Dhuxulow ayaa xilka kala wareegay Agaasimihii hore ee Hay’adda, Mudane Axmed Saciid Maxamed. Munaasabadda xil wareejinta waxaa sidoo kale ka soo qeyb galay mas’uuliyiin kale oo ka tirsan dowladda, oo ay ka mid yihiin Ra’iisul Wasaare ku xigeenka Dalka Mudane Mahdi Maxamed Guuleed iyo Wasiirka Amniga Gudaha Mudane Cabdullaahi Maxamed Nuur.
Mudane Mustaf Sheekh Cali Dhuxulow ayaa horay u soo noqday Xildhibaan ka tirsan Baarlamaanka Federaalka Soomaaliya, waxaana magacaabistiisa Agaasimaha Guud ee Hay’adda Socdaalka iyo Jinsiyadda ay timid kadib markii Golaha Wasiirrada ay ansixiyeen soo jeedinta Wasaaradda Amniga Gudaha.
Hay’adda Socdaalka iyo Jinsiyadda Soomaaliya ayaa ah hay’ad muhiim u ah dalka, oo ka shaqeysa arrimaha socdaalka iyo jinsiyadda, waxaana la filayaa in Agaasimaha cusub uu dardargeliyo howlaha hay’adda si loo fududeeyo adeegyada ay u qabato shacabka Soomaaliyeed.
