Ra’iisul Wasaaraha Soomaaliya oo ku dhawaaqay in dhowaan la bilaabi doono diiwaangelinta dadweynaha ee doorashada qof iyo cod ah ee ka dhici doonta Jubbaland.

Ra’iisul Wasaaraha Xukuumadda Federaalka Soomaaliya Xamse Cabdi Barre, ayaa ku dhawaaqay in dhowaan la bilaabi doono diiwaangelinta dadweynaha ee doorashada qof iyo cod ah ee ka dhici doonta deegaanada Maamulka Jubbaland.

Ra’iisul Wasaaraha oo khudbad ka jeediyay magaalada Muqdisho ayaa sheegay in diiwaangelinta doorashooyinka dowladaha hoose ay si rasmi ah uga socoto dhammaan dowlad-goboleedyada dalka, iyadoo Jubbaland ay tahay maamulkii ugu dambeeyay ee qorshuhu ka bilaaban doono.

“Diiwaangelinta doorashada qof iyo cod ah ayaa dhowaan laga bilaabi doonaa Jubbaland, si shacabka ku dhaqan deegaannadaasi u helaan xuquuqdooda dastuuriga ah,” ayuu yiri Ra’iisul Wasaare Xamse.

Hadalka Ra’iisul Wasaaraha ayaa imaanaya xilli Dowladda Federaalka Soomaaliya ay ku hawlan tahay diyaarinta doorashooyinka goleyaasha deegaanka, kuwaas oo lagu wado inay dalka ka qabsoomaan bisha October ee sanadkan.