Ra’iisul Wasaare Ku-xigeenka Xukuumadda Federaalka Soomaaliya, Mudane Salah Ahmed Jama, ayaa galabta si rasmi ah u guddoomiyay munaasabadda xil-wareejinta Wasaaradda Warfaafinta, Dhaqanka iyo Dalxiiska, taas oo si habsami leh uga dhacday xarunta dhexe ee wasaaradda ee magaalada Mogadishu.
Munaasabaddan oo ahayd mid si weyn loo soo agaasimay ayaa waxaa xilka ku kala wareegay Wasiirkii hore ee Wasaaradda Warfaafinta, Mudane Daa’uud Aweys Jaamac, iyo Wasiirka cusub ee la wareegay hoggaanka wasaaradda, Mudane Cabdifitaax Qaasin Maxamuud. Xil-wareejintan ayaa ka mid ah habraacyada dowladnimada ee lagu xaqiijiyo sii socoshada shaqada hay’adaha dowladda.
Ra’iisul Wasaare Ku-xigeenka ayaa munaasabadda ka jeediyay hadal uu ku faahfaahiyay muhiimadda ay leedahay Wasaaradda Warfaafinta, isagoo sheegay in ay tahay tiir muhiim u ah dowladnimada casriga ah, maadaama ay kaalin weyn ka qaadato wacyigelinta shacabka, faafinta xogta saxda ah, horumarinta warbaahinta qaranka, iyo ilaalinta sumcadda iyo aragtida dalka.
Wuxuu sidoo kale xusay in warbaahinta dowladdu ay tahay aalad muhiim ah oo lagu mideeyo bulshada, isla markaana lagu xoojiyo wadajirka qaran, sidaas darteedna ay lagama maarmaan tahay in la sii horumariyo tayada iyo hufnaanta shaqada wasaaradda.
Mudane Saalax Axmed Jaamac ayaa uga mahadceliyay Wasiirkii hore ee Wasaaradda Warfaafinta Mudane Daa’uud Aweys Jaamac dadaalkii iyo shaqadii uu qabtay muddadii uu xilka hayay, isagoo tilmaamay in uu ka tagay raad muuqda oo ku saabsan horumarinta wasaaradda iyo shaqada warbaahinta qaranka.
Dhanka kale, Ra’iisul Wasaare Ku-xigeenka ayaa Wasiirka cusub Mudane Cabdifitaax Qaasin Maxamuud ugu hambalyeeyay xilka loo igmaday, isagoo ku boorriyay inuu sii xoojiyo shaqada wasaaradda, gaar ahaan horumarinta warbaahinta, casriyeynta nidaamka warfaafinta dowladda, iyo kor u qaadista xirfadaha shaqaalaha.
Munaasabadda ayaa waxaa sidoo kale ka soo qeyb galay masuuliyiin ka tirsan Dowladda Federaalka Soomaaliya, agaasimayaal guud, madax ka socday hay’adaha warbaahinta kala duwan ee dalka, iyo marti sharaf kale oo kala duwan, kuwaas oo dhammaantood ka marqaati kacay habsami u socodka xil-wareejinta.
Ugu dambeyn, munaasabadda ayaa lagu soo gabagabeeyay jawi is-afgarad iyo hambalyo ah, iyadoo la adkeeyay muhiimadda ay leedahay in la sii wado dadaallada lagu horumarinayo Wasaaradda Warfaafinta, Dhaqanka iyo Dalxiiska si ay u noqoto mid ka mid ah hay’adaha hormuudka u ah dowladnimada iyo horumarka dalka.