Sheekh Aadan Maxamed Nuur (Madoobe) ayaa si rasmi ah ugu guuleystay doorashada Hoggaamiyaha Dowlad-Goboleedka Koonfur Galbeed Soomaaliya, kaddib markii uu helay 88 cod oo aqlabiyad ah. Musharraxii la tartamayay ayaa helay hal cod, halka hal cod oo kale lagu sheegay inuu xumaaday ama aan la ansixin.
Doorashada oo ka dhacday magaalada Baydhabo ayaa waxaa si buuxda uga qeyb galay 90 mudane oo ka tirsan Golaha Wakiillada Dowlad-Goboleedka Koonfur Galbeed Soomaaliya, kuwaas oo soo xaadiray hoolka codbixinta.
Natiijada doorashada ayaa muujisay taageero aad u xooggan oo uu Sheekh Aadan Maxamed Nuur ka helay xildhibaannada, taas oo si cad u xaqiijisay guushiisa. Hannaanka doorashada ayaa lagu tilmaamay mid si habsami leh u dhacay, iyadoo la arkayay kala dambeyn iyo xasilooni inta ay socotay codeynta.
Guushan ayaa loo arkaa mid muhiim u ah marxaladda siyaasadeed ee Koonfur Galbeed, iyadoo la filayo in hoggaanka cusub uu diiradda saaro xoojinta nabadda, mideynta bulshada, iyo dardargelinta horumarka deegaanada dowlad-goboleedka.