Wasiirka Wasaaradda Arrimaha Gudaha, Federaalka iyo Dib-u-heshiisiinta Dowladda Galmudug, Mudane Cabdi Maxamed Jaamac (Cabdi Waayeel), ayaa maanta si rasmi ah u daah-furay kulanka soo bandhigidda iyo aqoon-isweydaarsiga Mashruuca Bulsho ee Galmudug. Kulankan ayaa ujeeddadiisu ahayd in la iftiimiyo himilooyinka, qorshayaasha iyo muhiimadda uu mashruucani u leeyahay horumarinta bulshada iyo xoojinta dowladnimada hoose ee deegaannada Galmudug.
Intii uu socday kulanka, waxaa si qoto dheer loogu falanqeeyay ujeeddooyinka iyo qorshayaasha Mashruuca Bulsho, iyadoo xoogga la saaray xoojinta wada-shaqeynta ka dhaxaysa dowladda iyo bulshada, kor u qaadista ka qaybgalka shacabka ee arrimaha horumarinta, iyo taageeridda maamullada degmooyinka si ay u noqdaan kuwo awood leh, hufan, isla markaana si wax ku ool ah uga jawaabi kara baahiyaha bulshada.
Kulanka waxaa ka soo qayb galay masuuliyiin heerar kala duwan leh, oo ay ka mid yihiin Wasiir Ku-xigeenka Wasaaradda Arrimaha Gudaha, Federaalka iyo Dib-u-heshiisiinta Galmudug, Agaasimaha Guud ee Wasaaradda Arrimaha Gudaha, Federaalka iyo Dib-u-heshiisiinta Dowladda Federaalka Soomaaliya, Agaasimaha Guud ee Wasaaradda Arrimaha Gudaha Galmudug, Guddoomiyaha Gobolka iyo guddoomiyeyaasha degmooyinka Dowladda Galmudug. Ka qeybgalka mas’uuliyiintan ayaa muujinaya muhiimadda gaarka ah ee la siinayo hirgelinta mashruucan iyo wada-shaqeynta heerarka kala duwan ee dowladda.
Mas’uuliyiintii ka hadlay madasha ayaa si wadajir ah u adkeeyay muhiimadda uu Mashruuca Bulsho u leeyahay horumarinta adeegyada bulshada, xoojinta nidaamka dowladnimada hoose iyo kobcinta xiriirka iyo iskaashiga u dhexeeya dowladda iyo shacabka. Waxay sidoo kale tilmaameen in mashruucani uu gacan ka geysan doono dhismaha maamullo degmo oo tayo leh, hufan, isla markaana leh awood ay si degdeg ah ugaga jawaabaan baahiyaha iyo adeegyada ay bulshada u baahan tahay.
Wasiirka Arrimaha Gudaha Galmudug, Mudane Cabdi Maxamed Jaamac (Cabdi Waayeel), ayaa sheegay in dowladda Galmudug ay ka go’an tahay taageeridda dadaallada lagu horumarinayo adeegyada bulshada iyo xoojinta maamulka degmooyinka. Wuxuu xusay in iskaashiga dowladda iyo bulshada uu yahay saldhigga lagu gaari karo horumar waara, laguna dhisi karo maamullo shacabka ku kalsoon yihiin.
Ugu dambeyn, kulankan soo bandhigidda iyo aqoon-isweydaarsiga Mashruuca Bulsho ayaa qeyb ka ah dadaallada ay Dowladda Galmudug ku dooneyso in lagu xoojiyo dowladnimada hoose, kor loogu qaado ka qaybgalka bulshada ee arrimaha horumarinta, isla markaana lagu dhiso maamullo wax ku ool ah oo horseeda adeegyo tayo leh iyo horumar waara oo ay bulshada Galmudug ka faa’iideysato.