Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa maanta u ambabaxay dalka Kenya, safar oo noqonaya kii ugu horreeyay ee uu dibadda ugu baxo tan iyo markii uu dhammaaday muddo-xileedkiisa.
Wararka laga helayo safarka Madaxweynaha ayaa sheegaya in uu magaalada Nairobi kula kulmi doono Madaxweynaha Kenya, iyadoo la filayo in labada dhinac ay ka wada hadlaan xoojinta xiriirka labada dal, iskaashiga dhinacyada amniga, dhaqaalaha iyo arrimaha gobolka.
Safarka Madaxweynaha ayaa ku soo beegmaya xilli Soomaaliya iyo Kenya ay ka shaqeynayaan xoojinta iskaashiga labada dal iyo dardargelinta wada-shaqeynta ku saabsan nabadgelyada iyo horumarinta xiriirka diblomaasiyadeed.
Ilo wareedyo ayaa sidoo kale tilmaamaya in Madaxweyne Xasan Sheekh Maxamuud uu inta uu ku sugan yahay Kenya la yeelan doono kulamo kala duwan oo uu la qaadanayo madaxda dalkaasi iyo mas’uuliyiin kale, inkastoo aan si rasmi ah loo shaacin ajandaha guud ee wada-hadallada.
Safarkan ayaa noqonaya kii ugu horreeyay ee Madaxweyne Xasan Sheekh Maxamuud uu ku tago dalka dibaddiisa kadib dhammaadka muddo-xileedkiisa, waxaana la filayaa in kulamada uu la yeelanayo Madaxweynaha Kenya ay diiradda saaraan arrimo muhiim u ah labada dal iyo gobolka Geeska Afrika.