𝐌𝐀𝐗𝐊𝐀𝐌𝐀𝐃𝐃𝐀 𝐑𝐀𝐂𝐅𝐀𝐀𝐍𝐊𝐀 𝐁𝐀𝐍𝐀𝐀𝐃𝐈𝐑 𝐎𝐎 𝐗𝐎𝐑𝐑𝐈𝐘𝐀𝐃𝐃𝐀 𝐃𝐈𝐁 𝐔𝐆𝐔 𝐒𝐎𝐎 𝐂𝐄𝐋𝐈𝐒𝐀𝐘 𝐒𝐀𝐂𝐃𝐈𝐘𝐎 𝐁𝐀𝐉𝐀𝐀𝐉

Maxkamadda Racfaanka Gobolka Banaadir ayaa maanta go’aan kama dambays ah ka soo saartay dacwadda Sacdiyo Bajaaj, iyadoo maxkamaddu ugu dambayn go’aamisay in xorriyaddeeda dib loogu soo celiyo.

Sacdiyo Bajaaj ayaa horey Maxkamadda Gobolka Banaadir ugu xukuntay saddex sano oo xabsi ah, hase yeeshee xukunkaas ayaa racfaan laga qaatay, waxaana dacwadda loo gudbiyay Maxkamadda Racfaanka Gobolka Banaadir si dib loogu eego.

Kadib dhageysiga iyo dib-u-eegista dacwadda, Maxkamadda Racfaanka ayaa sheegtay in xukunkii hore uusan ku dhisnayn sabab iyo saldhig sharci oo ku filan. Sidaas darteed, maxkamaddu waxay go’aamisay in la buriyo xukunkii saddexda sano ahaa ee horey loogu riday Sacdiyo Bajaaj.

Go’aanka Maxkamadda Racfaanka ayaa ka dhigan in Sacdiyo Bajaaj ay dib u heshay xorriyaddeeda, iyadoo meesha laga saaray xukunkii hore ee xabsiga.

Go’aankan ayaa sidoo kale soo afjaraya marxaladdii racfaanka ee dacwadda, waxaana xarunta Maxkamadda Racfaanka Gobolka Banaadir maanta isugu soo baxay dad badan oo si weyn ula socday natiijada kama dambaysta ah ee kiiska.

Xukunka maxkamadda ayaa si weyn loo hadal hayaa, iyadoo dad badan ay sugayeen go’aanka kama dambaysta ah ee laga gaarayo kiiska Sacdiyo Bajaaj.