Jamhuuriyadda Federaalka Soomaaliya ayaa tacsi tiiraanyo leh u dirtay Dowladda iyo shacabka walaalaha ah ee Jamhuuriyadda Dimuqraadiga Aljeeriya, kaddib dabab xooggan oo Arbacadii, 26 Agoosto 2026, ka kacay meelo kala duwan oo dalkaasi ka mid ah, gaar ahaan Gobolka Béjaïa.
Dowladda Soomaaliya ayaa muujisay sida ay uga xun tahay khasaaraha nafeed iyo dhaawacyada ka dhashay dababkaasi, iyadoo si gaar ah uga tacsiyadeysay qoysaska iyo ehelada ay musiibadu ka qaaday dadkooda.
Bayaan kasoo baxay Dowladda Soomaaliya ayaa lagu sheegay in shacabka Soomaaliyeed ay si weyn ula qaybsanayaan murugada iyo xanuunka ay dareemayaan qoysaska ay saameeyeen dababka, iyadoo Soomaaliya ay garab taagan tahay Dowladda iyo shacabka Aljeeriya xilligan adag.
Dowladda Soomaaliya ayaa sidoo kale Alle uga baryey dadka ku dhaawacmay dababkaasi inuu siiyo caafimaad degdeg ah, halka kuwa ku geeriyoodayna looga baryey inuu naxariistiisa janno ka waraabiyo, eheladoodana uu samir iyo iimaan ka siiyo.
Sidoo kale, Dowladda Federaalka Soomaaliya ayaa bogaadisay dadaallada ay wadaan mas’uuliyiinta Aljeeriya, ciidamada gurmadka, shaqaalaha caafimaadka iyo adeegyada degdegga ah ee ku howlan xakamaynta dababka, samatabbixinta dadka iyo yareynta khasaaraha ka dhashay musiibada.
Soomaaliya waxay xustay muhiimadda ay leedahay in la xoojiyo dadaallada lagu badbaadinayo dadka iyo hantida, iyadoo ku boorrisay dhammaan hay’adaha ay khuseyso inay sii wadaan gurmadka iyo taageerada loo fidinayo bulshada ay dababku saameeyeen.
Jamhuuriyadda Federaalka Soomaaliya ayaa mar kale xaqiijisay garab istaaggeeda joogtada ah ee ay u hayso Dowladda iyo shacabka walaalaha ah ee Aljeeriya, iyadoo sheegtay inay la qaybsanayso murugada qoysaska ay musiibadu saameysay, isla markaana rajaynayso in xaaladda dababka si degdeg ah loo xakameeyo.
Dowladda Soomaaliya ayaa ugu dambeyn Alle uga baryey Dowladda iyo shacabka Aljeeriya inay ka gudbaan dhibaatadan, isla markaana dalkaasi uu helo xasillooni iyo nabad, iyadoo shacabka ay musiibadu saameysay loo rajeynayo in ay si nabad ah uga soo kabtaan khasaaraha ka dhashay dababka.