Taliyaha Ciidanka Cirka Soomaaliyeed, Sareeye Guuto Cabdirisaaq Maxamuud Xaaji, ayaa maanta magaalada Muqdisho ku soo dhaweeyey wafdi sare oo ka socda Ciidanka Cirka Pakistan, kaas oo uu hoggaaminayo Taliyaha Difaaca Cirka, ahna Taliye Ku-xigeenka Ciidanka Cirka Pakistan, Air Marshal Muhammad Sarfraz.
Soo dhaweynta wafdigan ayaa qayb ka ah xoojinta xiriirka iyo iskaashiga milatari ee u dhexeeya Soomaaliya iyo Pakistan, gaar ahaan dhinaca ciidamada cirka iyo arrimaha difaaca.
Kulanka iyo booqashada wafdiga ayaa fursad u noqon kara labada dhinac inay kaga wada hadlaan sidii loo horumarin lahaa iskaashiga dhinacyada tababarrada ciidanka, kobcinta aqoonta iyo xirfadaha shaqaalaha ciidamada cirka, iyo is-dhaafsiga khibradaha la xiriira hawlaha difaaca cirka.
Soomaaliya iyo Pakistan ayaa leh xiriir iskaashi oo dhinacyo badan leh, iyadoo iskaashiga dhinaca milatarigu uu ka mid yahay arrimaha muhiimka ah ee labada dal ay daneynayaan in la sii xoojiyo.
Booqashada wafdiga Ciidanka Cirka Pakistan ee Muqdisho ayaa sidoo kale ku soo beegmaysa xilli Soomaaliya ay waddo dadaallo lagu horumarinayo awoodda iyo tayada hay’adaha amniga iyo difaaca dalka.