Taliyaha Ciidanka Xoogga Dalka Soomaaliyeed, Sareeye Guuto Ibraahim Maxamed Maxamuud, ayaa saxiixay Amar ku saabsan Ka Hortagga iyo Wax-ka-qabashada Tacaddiyada ka dhanka ah Haweenka Xilliyada Colaadaha.
Amarkan ayaa qayb ka ah dadaallada lagu xoojinayo ilaalinta xuquuqda haweenka iyo ka hortagga tacaddiyada ka dhanka ah haweenka, gaar ahaan kuwa ka dhaca xilliyada colaadaha iyo xaaladaha amni-darrada.
Ujeeddada amarkan ayaa ah in la adkeeyo ilaalinta karaamada, xuquuqda iyo badqabka haweenka, iyadoo la xoojinayo waajibaadka ciidanka ee ku aaddan ka hortagga tacaddiyada iyo wax-ka-qabashada falalka ka dhanka ah haweenka.
Sidoo kale, amarku wuxuu qeexayaa waajibaadyo la xiriira ka hortagga, soo-sheegidda, baaritaanka iyo wax-ka-qabashada kiisaska tacaddiyada ka dhanka ah haweenka, iyadoo la raacayo shuruucda dalka iyo xeerarka caalamiga ah ee khuseeya ilaalinta dadka rayidka ah xilliyada colaadaha.
Tallaabadan ayaa muujinaysa muhiimadda ay Ciidanka Xoogga Dalka Soomaaliyeed siinayaan ilaalinta xuquuqda aadanaha iyo u hoggaansanaanta waajibaadka ka saaran ilaalinta dadka rayidka ah, gaar ahaan haweenka iyo gabdhaha ay saameeyaan colaadaha.
Saxiixa amarkan ayaa ka dhashay wada-shaqeyn iyo dadaallo joogto ah oo ay wadeen Kooxda Xuquuqda Aadanaha iyo Ilaalinta ee UNTMIS iyo Wakiilka Gaarka ah ee Xoghayaha Guud ee Qaramada Midoobay u qaabilsan Tacaddiyada Galmada ee La Xiriira Colaadaha.
Hay’adahan ayaa Ciidanka Xoogga Dalka Soomaaliyeed kala shaqeynayay sidii loo horumarin lahaa tallaabooyinka ka hortagga iyo wax-ka-qabashada tacaddiyada ka dhanka ah haweenka xilliyada colaadaha.
Amarkan ayaa sidoo kale muhiim u noqon kara xoojinta isla-xisaabtanka, kor u qaadista wacyiga ciidamada iyo horumarinta habraacyada lagu ilaalinayo haweenka iyo gabdhaha ku nool deegaannada ay saameeyeen colaadaha.