Safiirka cusub ee Turkiga u fadhiya Soomaaliya, oo aan weli si rasmi ah dowladda Soomaaliya ugu gudbin waraaqaha danjirenimo, ayaa maanta kormeer ku tagay Saldhigga TURKSOM ee magaalada Muqdisho, oo ka mid ah xarumaha muhiimka ah ee lagu tababaro ciidamada Soomaaliya.
Intii uu kormeerka ku guda jiray, safiirka ayaa warbixinno ka dhageystay saraakiisha iyo mas’uuliyiinta xarunta, kuwaas oo uga warbixiyay howlaha tababarka ciidamada Soomaaliyeed, xaaladda xarunta iyo barnaamijyada iskaashiga milatari ee u dhexeeya Soomaaliya iyo Turkiga.
Saldhigga TURKSOM ayaa muddooyinkii u dambeeyay door muhiim ah ka qaatay tababarka iyo tayeynta ciidamada Soomaaliya, iyadoo ciidamo Soomaaliyeed oo ka tirsan qaybaha kala duwan ee ciidamada qalabka sida lagu siiyo tababarro ciidan oo ay bixiyaan saraakiil iyo tababarayaal Turkish ah.
Kormeerka safiirka ayaa ku soo beegmaya xilli Soomaaliya iyo Turkiga ay leeyihiin xiriir iskaashi oo dhinacyo badan leh, gaar ahaan dhinacyada amniga, difaaca, tababarka ciidamada iyo xoojinta awoodda hay’adaha amniga Soomaaliya.
TURKSOM waxaa sidoo kale lagu tababaraa saraakiil iyo askar Soomaaliyeed oo markii dambe ka hawlgala qaybo kala duwan oo ka tirsan ciidamada qalabka sida, iyadoo xaruntu ay qayb ka tahay dadaallada lagu dhisayo ciidan Soomaaliyeed oo leh tababar iyo aqoon ciidan oo casri ah.
Kormeerka maanta ayaa sidoo kale muujinaya muhiimadda uu Turkigu siinayo iskaashiga amni iyo difaac ee uu la leeyahay Soomaaliya, iyadoo labada dal ay sannadihii u dambeeyay xoojiyeen xiriirkooda dhinacyada militari iyo amniga.
Safiirka cusub ayaa la filayaa inuu sii wado kulamada iyo booqashooyinka uu ku baranayo hay’adaha iyo xarumaha muhiimka ah ee Soomaaliya, gaar ahaan kuwa la xiriira iskaashiga labada dal.