Guddiga Madaxa-bannaan ee Doorashooyinka Qaranka iyo Soohdimaha ayaa maalintii saddexaad ee shirka Khibrad-wadaagga kulan la yeeshay wakiillo ka socday qaybaha kala duwan ee Bulshada Rayidka Soomaaliyeed, kuwaas oo ay ka mid yihiin Golaha Haweenka Qaranka iyo Culimada Soomaaliyeed.
Kulankan ayaa qayb ka ah shirar iyo wada-tashiyo uu guddigu maalmahan la yeelanayay qaybaha kala duwan ee bulshada, kuwaas oo diiradda lagu saarayo is-dhaafsiga khibradaha, aragtiyada iyo talooyinka la xiriira hannaanka doorashooyinka dalka.
Intii uu kulanku socday, waxaa diiradda lagu saaray doorka ay Bulshada Rayidka Soomaaliyeed ku leedahay geeddi-socodka doorashooyinka, gaar ahaan kaalinta haweenka, culimada iyo ururrada bulshada ee ku aaddan wacyigelinta dadweynaha, dhiirrigelinta ka-qaybgalka bulshada iyo xoojinta fahamka nidaamka doorashooyinka.
Sidoo kale, kulanka ayaa fursad u siinaya dhinacyada ka qaybgalaya inay soo bandhigaan aragtiyahooda, talooyinkooda iyo khibradaha ay u leeyihiin arrimaha doorashooyinka, si loo helo hannaan wada-shaqeyn oo mideeya guddiga iyo bulshada rayidka.
Golaha Haweenka Qaranka ayaa ka mid ah qaybaha bulshada ee laga filayo inay door muuqda ka qaataan dhiirrigelinta ka-qaybgalka haweenka ee arrimaha siyaasadda iyo doorashooyinka, halka Culimada Soomaaliyeed ay bulshada ka taageeri karaan wacyigelinta, nabadda, is-ixtiraamka iyo xoojinta wadajirka bulshada.
Shirka Khibrad-wadaagga ayaa muujinaya dadaalka guddiga ee ku aaddan ballaarinta wada-tashiyada iyo la-shaqeynta qaybaha kala duwan ee bulshada, iyadoo la doonayo in aragtiyaha iyo talooyinka bulshada lagu daro dadaallada la xiriira horumarinta hannaanka doorashooyinka qaranka.
Guddiga Madaxa-bannaan ee Doorashooyinka Qaranka iyo Soohdimaha ayaa kulamadan ku xoojinaya xiriirka iyo wada-shaqeynta hay’adaha bulshada, si loo dhiirrigeliyo ka-qaybgal loo dhan yahay iyo faham bulsho oo ku saabsan doorashooyinka Soomaaliya.