Kumanaan arday ah oo dhigta fasalka 8-aad ee dugsiyada dhexe ee Gobolka Banaadir ayaa maanta isugu soo baxay fagaaraha taariikhiga ah ee Daljirka Dahsoon ee magaalada Muqdisho, kadib markii si rasmi ah uu u soo dhammaaday Imtixaanka Shahaadiga ah ee Dugsiga Dhexe.
Ardaydan oo ka kala yimid degmooyinka Gobolka Banaadir ayaa muujiyay farxad iyo raynrayn weyn, iyagoo isugu hambalyeynayay dhammaadka marxalad muhiim ah oo ka mid ah waxbarashadooda. Fagaaraha Daljirka Dahsoon ayaa noqday goob ay ku kulmaan ardayda iyo qoysaskooda, halkaas oo ay ku muujiyeen dareenkooda guusha iyo yididiilada mustaqbalka.
Qaar ka mid ah ardayda ayaa si wadajir ah u qaaday sawirro, halka qaar kalena ay ku muujiyeen farxaddooda heeso iyo sacab, taas oo ka tarjumaysay culayskii iyo dadaalkii ay soo galeen intii uu socday imtixaanka.
Mas’uuliyiin ka tirsan maamulka waxbarashada Gobolka Banaadir ayaa goobta ku sugnaa, iyagoo ardayda ku bogaadiyay dadaalkooda iyo adkeysiga ay muujiyeen muddadii uu socday imtixaanka. Waxay sidoo kale waalidiinta iyo macallimiinta uga mahadceliyeen kaalinta ay ka qaateen diyaarinta iyo taageeridda ardayda.
Imtixaanka Shahaadiga ah ee Fasalka 8-aad ayaa sanadkan lagu qabtay si habsami leh, iyadoo lagu dadaalay in la xaqiijiyo daah-furnaan, nidaam iyo cadaalad, si ardaydu u helaan fursad siman oo ay ku muujin karaan aqoontooda.
Ugu dambeyntii, soo bixitaanka ardaydan ee fagaaraha Daljirka Dahsoon ayaa loo arkaa astaan farxadeed oo muujinaysa dhammaadka marxalad waxbarasho iyo bilowga safar cusub oo ay ugu gudbayaan heerka xiga ee waxbarashada dugsiga sare.