Xildhibaan Cabdiraxmaan Cabdishakuur Warsame ayaa bogaadin u jeediyey guddiga doorashooyinka Somaliland, kaas oo go’aamiyey doorashada maamulkaas, oo la filayo in ay dhacdo bisha 11-aad ee sanadkaan aan ku guda jirno.
Qoraal uu soo dhigay bartiisa Facebook ayuu Mr. Warsame ku yiri, “Waxaa bogaadin mudan guddiga doorashooyinka Somaliland ee ugu danbayn go’aamiyey in bisha November ee sanadka la qabto doorashooyinkii madaxtinimada maamulkaas.”
Xildhibaan Cabdiraxmaan Cabdishakuur Warsame ayaa baqdin ka muujiyey doorashadaan, isaga oo sheegay in Itoobiya isku deyi doonta xeelado taban iyo faragelin gurracan, oo uu ku sheegay in ay ku gacansiinayso dib u soo laabashada Muuse Biixi.
Ugu dambeyn Xildhibaan Cabdiraxmaan Cabdishakuur Warsame oo hadda ah mudane ka tirsan Baarlamaanka Soomaaliya ayaa baaq u diray Xisbiyada mucaaradka iyo Ururada siyaasadda ee Somaliland, isaga oo yiri, “Xisbiyada Mucaaradka ah iyo ururrada kale ee siyaasadeed ee Somaliland, waxaa saaran masuuliyad wayn oo u bahaan xikmad , dulqaad, ku dhac iyo dhiiranaan lagu wajo mitid dirirka Muuse, caqabadaha uu dhigayo iyo miinooyinka siyaasadeed ee uu aaasayo.”
Warka ka soo yeeray Xildhibaan Cabdiraxmaan Cabdishakuur ayaa ku soo aadaya tallaabadii ay qaaday dowladda Itoobiya billowgii sanadkaan, ka dib markii magaalada Addis Ababa ay heshiis is afgarad ah kuwada saxiixdeen Ra’iisul Wasaaraha Itoobiya iyo Madaxweynaha Somaliland Muse Bixi.
Hoggaamiyaha Hargeysa ee Siyaasadda ka soo galay dhanka ciidanka Muuse Bixi ayaa xilligaan wajahaya doorasho ka adag tii 2017-kii, isaga oo xilka kala wareegay saaxiibkiisa ay Xisbi wadaag ahaayeen Axmed Siinlaayo.