Wararka ka imaanaya Magaalada Muqdisho ayaa sheegaya in degmada Wadajir maanta laga sameeyay olole nadaafadeed oo lagu hagaajinayo bilicda waddooyinka iyo biyo-mareennada degmada, iyadoo laga jawaabayo amarka Guddoomiyaha Gobolka Banaadir ahna Duqa Muqdisho, Mudane Maxamed Axmed Amiir.
Ololahan nadaafadeed ayaa waxaa horkacayay maamulka degmada Wadajir oo uu hoggaaminayo Guddoomiyaha degmada, Mudane Cabdiraxmaan Maxamed Cali. Howlgalkan ayaa diiradda lagu saaray waddooyinka waaweyn, goobo muhiim ah oo dadweynuhu ku kulmaan, iyo meelo ay biyo fariisteen.
Guddoomiye Cabdiraxmaan Maxamed Cali ayaa shacabka ku dhaqan degmada Wadajir ugu baaqay inay si firfircoon uga qeyb qaataan ololaha nadaafadda si loo xaqiijiyo deegaanka oo nadiif ah. Sidoo kale, waxa uu ganacsatada ku boorriyay inay ku dadaalaan nadaafadda goobahooda ganacsi iyo agagaarkooda, taasoo qayb ka ah dadaallada lagu kobcinayo bilicda iyo caafimaadka degmada.
Ololahan ayaa qeyb ka ah qorshe ballaaran oo uu horkacayo maamulka Gobolka Banaadir, kaasoo lagu doonayo in magaalada Muqdisho looga dhigo magaalo nadiif ah oo bilicsan. Shacabka degmada Wadajir ayaa la filayaa inay si wanaagsan u taageeraan dadaalladan si loo xaqiijiyo natiijooyin waxtar leh.
Waxaa xusid mudan in ololeyaasha noocan oo kale ah ay door muhiim ah ka qaataan kor u qaadista caafimaadka dadweynaha, yaraynta cudurrada ka dhasha nadaafad-xumada, iyo xoojinta dareenka iskaashiga bulshada.
