Taliyaha Qaybta Booliiska Gobolka Bari, G/Sare Cabdulqaadir Jaamac Dirir, ayaa sheegay in howlgalkan uu yahay mid ka mid ah tallaabooyinka sii xoojinaya dagaalka ay Puntland kula jirto kooxda Daacish, kaddib markii horay loola galay dagaallo toos ah oo lagu gaarey guulo muhiim ah.
Taliyaha ayaa xusay in howlgallada ay wadaan ay yihiin kuwa isugu jira weerarro toos ah, duqeymo cir ah iyo tallaabooyin lagu xakameynayo isku dayada gurmad ee kooxdaasi heli karto, isaga oo intaas ku daray in sidoo kale bartilmaameed laga dhigay dadka la shaqeeya ama garab istaaga kooxda.
Booliiska Puntland ayaa digniin u diray dhammaan shakhsiyaadka ku lug leh taageerada Daacish, waxaana la faray hay’adaha amniga in ay si adag uga hortagaan, isla markaana maxkamad horkeeni doonaan cid kasta oo lagu helo xiriir la leh kooxdaas.