Madaxweynaha Turkiga, Recep Tayyip Erdoğan, ayaa sheegay in magaalada Ankara ay mustaqbalka dhow si weyn u kordhin doonto saameynteeda caalamiga ah, isla markaana ay isu beddeli doonto xarun muhiim u ah diblomaasiyadda dunida. Erdoğan ayaa hadalkan ka jeediyay kulan ay yeesheen xubnaha iyo taageerayaasha xisbiga AK Party ee magaalada Ankara, halkaas oo uu ku soo bandhigay guulaha ay dowladdiisu gaartay 25-kii sano ee la soo dhaafay.
Madaxweynaha ayaa xusay in martigelinta shirarka waaweyn ee caalamiga ah, gaar ahaan shirarka NATO iyo Ururka Dowladaha Turkiga (TDT), ay sare u qaadi doonaan muuqaalka Ankara ee fagaaraha caalamka. Wuxuu sheegay in caasimadda Turkigu ay noqon doonto goob ay ku kulmaan hoggaamiyeyaasha dunida, taasoo sii xoojin doonta doorka Turkiga ee arrimaha gobolka iyo kuwa caalamkaba.
Erdoğan ayaa sheegay in Ankara ay markhaati ka ahayd dhammaan marxaladihii uu soo maray xisbiga AK Party tan iyo markii la aasaasay sanadkii 2001. Wuxuu xusay in markii xisbiga la aas-aasayay ay dad badan shaki ka qabeen in Turkigu gaari karo horumar degdeg ah oo dhinacyada dhaqaalaha, amniga, waxbarashada, caafimaadka iyo siyaasadda dibadda ah.
Madaxweynaha ayaa ku faanay koboca dhaqaale ee dalkiisu gaaray, isagoo sheegay in dhoofinta Turkiga ay kor uga kacday 36 bilyan oo dollar ilaa 275 bilyan oo dollar. Sidoo kale wuxuu tilmaamay in dakhliga dalxiiska uu gaaray 65 bilyan oo dollar, halka warshadaha difaaca ay noqdeen mid ka mid ah tiirarka ugu muhiimsan ee dhaqaalaha dalka, iyadoo dhoofinta qalabka difaaca ay gaartay 11 bilyan oo dollar.
Erdoğan ayaa sheegay in Ankara ay hormuud u noqotay horumarka warshadaha difaaca Turkiga, kuwaas oo maanta dalka ka dhigay quwad si weyn looga tixgeliyo gobolka iyo caalamka. Wuxuu xusay in guulahaas ay ka dhasheen dib-u-habaynno waaweyn iyo siyaasado muddo dheer la qorsheeyay.
Madaxweynaha Turkiga ayaa sidoo kale sheegay in dalkiisu uu ka gudbay heerkii uu ahaan jiray quwad goboleed oo keliya, isagoo hadda door muuqda ku leh siyaasadda iyo diblomaasiyadda caalamka. Wuxuu carrabka ku adkeeyay in Turkigu maanta yahay dal ay dunidu si dhow ula socoto go’aamadiisa iyo mowqifyadiisa.
Dhamaadkii khudbaddiisa, Erdoğan wuxuu uga mahadceliyay shacabka Ankara taageerada ay siiyeen AK Party tan iyo markii la aasaasay. Wuxuu sheegay in sannadkan la xusayo sanad-guuradii 25-aad ee xisbiga, isla markaana dabaaldeg weyn loo qaban doono bartamaha bisha Agoosto.
Erdoğan ayaa ugu dambeyn ku baaqay in la ilaaliyo midnimada iyo wadajirka shacabka Turkiga, isagoo sheegay in guulaha la gaaray ay ka dhasheen taageerada shacabka iyo dadaalka wadajirka ah ee lagu horumarinayo dalka.