Agaasimaha Guud ee Wasaaradda Waxbarashada, Hiddaha iyo Tacliinta Sare ee Dowladda Galmudug, Mudane Albashiir Cilmi Xuseen, iyo Agaasimaha Imtixaanaadka Wasaaradda, Mudane Axmed Xuseen Khayre, ayaa maanta si diirran ugu soo dhoweeyay garoonka diyaaradaha magaalada Dhuusamareeb hawl-wadeenno ka socday Wasaaradda Waxbarashada, Hiddaha iyo Tacliinta Sare ee Dowladda Federaalka Soomaaliya.
Hawl-wadeennadan oo ka yimid heer federaal ayaa Galmudug u yimid si ay uga qayb qaataan isla markaana ay u kormeeraan habsami u socodka iyo qabsoomidda Imtixaanka Shahaadiga ah ee Fasalka 12-aad ee dugsiyada sare, kaas oo lagu wado inuu si rasmi ah uga bilaabmo Sabtida soo socota dhammaan deegaannada Galmudug iyo guud ahaan dalka Soomaaliya.
Soo dhoweynta diirran ee lagu qaabilay kormeereyaasha imtixaanka ayaa muujinaysa sida ay Galmudug uga go’an tahay dardargelinta iyo xaqiijinta tayada waxbarashada, isla markaana ay uga shaqeyneyso in imtixaanka qaranka uu u qabsoomo si hufan, cadaalad ah oo nidaamsan. Tani waxay sidoo kale ka tarjumaysaa heerka sare ee wada-shaqeynta ka dhexeysa Wasaaradda Waxbarashada ee heer federaal iyo Wasaaradaha Waxbarashada ee dowlad goboleedyada.
Mas’uuliyiinta Galmudug ayaa sheegay in imtixaanka shahaadiga ah uu yahay mid muhiim u ah mustaqbalka ardayda Soomaaliyeed, isla markaana uu saldhig u yahay horumarinta tayada waxbarashada dalka. Waxay sidoo kale carrabka ku adkeeyeen in dhammaan diyaar-garowga la xiriira imtixaanka uu si habsami leh u socdo, iyadoo la hubinayo amniga, daah-furnaanta iyo in ardaydu ay ku galaan xaalad deggan oo ku habboon.
Dhanka kale, hawl-wadeennada imtixaanka ee ka socday Wasaaradda Waxbarashada ee Dowladda Federaalka Soomaaliya ayaa sheegay inay ku faraxsan yihiin soo dhoweynta diirran ee ay kala kulmeen Galmudug, ayna diyaar u yihiin inay ka shaqeeyaan hirgelinta imtixaan hufan oo lagu kalsoonaan karo.
Ugu dambeyntii, imaanshaha iyo wada-shaqeynta labada heer ee dowladdu waxay muujinaysaa dadaalka joogtada ah ee lagu xoojinayo nidaamka waxbarashada dalka, gaar ahaan horumarinta iyo tayeynta Imtixaanka Qaranka, kaas oo muhiim u ah jiilka mustaqbalka ee Soomaaliya.