Mudanayaasha Golaha Shacabka ee Baarlamaanka Jamhuuriyadda Federaalka Soomaaliya ayaa xarunta Golaha Shacabka ku yeeshay Kalfadhiga 8-aad, kulankiisa 8-aad, waxaana shir guddoominayay Guddoomiyaha Golaha Shacabka, Mudane Cabdulqaadir Maxamed Nuur (Jaamac), oo uu wehelinayay Guddoomiye Ku-xigeenka Labaad ee Golaha Shacabka, Mudane Cabdullaahi Cumar Abshirow.
Kulanka ayaa looga hadlay dhowr qodob oo muhiim ah oo la xiriira howlaha sharci-dejinta, iyadoo Xildhibaanadu ay sii ambaqaadeen ka doodista hindise-sharciyeedyada horyaalla Golaha.
Ugu horreyn, Xildhibaanada Golaha Shacabka ayaa sii waday ka doodista Hindise-sharciyeedka Dembiyada Kufsiga iyo Anshax-xumada Kale, kaas oo dooddiisu ay bilaabatay kulankii hore ee Golaha ee dhacay Arbacadii lasoo dhaafay.
Xildhibaanada ayaa kulanka ka jeediyay aragtiyo iyo talooyin kala duwan oo ku saabsan qodobbada hindise-sharciyeedka, iyadoo dooddu ay qayb ka tahay hannaanka sharci-dejinta ee Golaha Shacabka. Hindise-sharciyeedkan ayaa muhiimad gaar ah u leh dejinta xeerar iyo habraacyo la xiriira ka hortagga dembiyada kufsiga iyo anshax-xumada kale, iyo sidii loo xoojin lahaa ilaalinta bulshada.
Dhinaca kale, Golaha Shacabka ayaa Akhrinta Koowaad marsiiyay laba hindise-sharciyeed oo kala ah Hindise-sharciyeedka Arrimaha Qoyska iyo Hindise-sharciyeedka Xuquuqda Carruurta, kuwaas oo ay soo diyaarisay Wasaaradda Qoyska iyo Horumarinta Xuquuqul Insaanka ee Xukuumadda Federaalka Soomaaliya.
Wasiirka Wasaaradda Qoyska iyo Horumarinta Xuquuqul Insaanka, Marwo Khadiija Maxamed Al-Makhzoumi, ayaa Golaha la wadaagtay warbixinta iyo faahfaahinta ku saabsan Akhrinta Koowaad ee labada hindise-sharciyeed, iyadoo sharaxaad ka bixisay muhiimadda ay u leeyihiin bulshada Soomaaliyeed.
Hindise-sharciyeedka Arrimaha Qoyska ayaa diiradda saaraya nidaaminta iyo ilaalinta arrimaha qoyska, halka Hindise-sharciyeedka Xuquuqda Carruurta uu muhiim u yahay xoojinta ilaalinta iyo daryeelka carruurta Soomaaliyeed, iyo in la helo hannaan sharci oo qeexaya xuquuqda iyo waajibaadka la xiriira carruurta.
Xildhibaanada ayaa sidoo kale loo gudbiyay qodobadii xigay ee ajandaha, iyadoo ugu dambeyn Golaha Shacabka loo qeybiyay Akhrinta Labaad ee Hindise-sharciyeedka Dhismaha Hay’adda Dakhliga Qaranka iyo Akhrinta Labaad ee Hindise-sharciyeedka Iskaashiga Garsoorka Caalamiga ah.
Labadan hindise-sharciyeed ayaa loo qeybiyay Xildhibaanada si ay u sii eegaan una soo akhriyaan qodobbada ku jira, ka hor inta aan laga gaarin go’aannada xiga ee ku saabsan hannaanka sharci-dejinta.
Kulankan ayaa kamid ah dadaallada Golaha Shacabka uu ku dardargelinayo shaqada sharci-dejinta, iyadoo Baarlamaanku uu ka shaqeynayo hindise-sharciyeedyada kala duwan ee muhiimka u ah dowladnimada, ilaalinta xuquuqda bulshada, horumarinta hay’adaha dowladda iyo xoojinta nidaamka cadaaladda dalka.
Golaha Shacabka ayaa la filayaa inuu sii wado ka doodista iyo meel-marinta hindise-sharciyeedyada horyaalla, iyadoo Xildhibaanada ay door muhiim ah ku leeyihiin hubinta in sharciyada la ansixinayo ay waafaqsan yihiin baahiyaha bulshada Soomaaliyeed iyo danta guud ee dalka.