Guddiga Dhaqaalaha, Maaliyadda, Ganacsiga, Warshadaha, Isgaarsiinta iyo Dalxiiska ee Aqalka Sare ee Baarlamaanka Federaalka Soomaaliya ayaa maanta xafiiskooda ku qaabilay mas’uuliyiin ka socotay Wasaaradda Maaliyadda, kuwaas oo uu hoggaaminayay Wasiir-ku-xigeenka Wasaaradda, Mudane Cabdulqafaar Cilmi Xaange.
Kulanka oo uu shir-guddoominayay Guddoomiyaha Guddiga, Senator Cabdi Axmed Dhuxulow (Dhagdheer), ayaa diiradda lagu saaray Hindise-Sharciyeedka Dhisidda Hay’adda Dakhliga, gaar ahaan qodobbada la xiriira qaab-dhismeedka iyo waajibaadka shaqo ee Hay’adda.
Xubnaha Guddiga ayaa mas’uuliyiinta Wasaaradda Maaliyadda ka dalbaday faahfaahin iyo fasiraad dheeraad ah oo ku saabsan qodobbada kala duwan ee Hindise-Sharciyeedka, iyagoo soo bandhigay su’aalo iyo arrimo u baahan in si dheeraad ah loo caddeeyo.
Ujeeddada ayaa ahayd in Guddigu helo xog iyo aragti ku filan oo ka caawisa dib-u-eegista, sixitaanka, turxaan-bixinta iyo tayeynta Hindise-Sharciyeedka, si loo hubiyo inuu noqdo sharci dhammaystiran oo ka jawaabaya baahiyaha dalka.
Kulanka ayaa qeyb ka ah howlaha dastuuriga ah ee Aqalka Sare, gaar ahaan doorka Guddiyada ee dib-u-eegista iyo diyaarinta hindise-sharciyeedyada muhiimka u ah horumarinta nidaamka maaliyadeed iyo dakhliga dalka.