Afhayeenka Guddiga Madaxa Bannaan ee Doorashooyinka Qaranka iyo Soohdimaha, Mudane Abdifatah Faisal Hussein, ayaa shir jaraa’id ku qabtay xarunta dhexe ee Guddiga, isagoo faahfaahin ka bixiyey goobaha codbixinta ee degmooyinka gobolka Banaadir.
Mudane Abdifatah Faisal Hussein ayaa sheegay in goobaha codbixintu si taxadar leh loo diyaariyey, iyadoo la hubiyey in ay fududeynayaan ka qeybgalka muwaadiniinta. Waxa uu sidoo kale ku boorriyay shacabka gobolka Banaadir inay ka qeyb qaataan doorashada, isla markaana raacaan tilmaamaha Guddiga si loo xaqiijiyo doorasho nabad ah oo hufan.
Guddiga ayaa sheegay in faahfaahinta goobaha codbixinta iyo habraaca doorashada la shaacin doono maalmaha soo socda, isagoo ku adkeeyey in dadaallada Guddigu ay ku saleysan yihiin caddaalad, hufnaan, iyo ilaalinta rabitaanka shacabka.
Doorashadan ayaa lagu tilmaamay mid muhiim u ah xoojinta hufnaanta nidaamka dimuqraadiyadda iyo ka qeybgalka bulshada rayidka ah ee gobolka Banaadir.