Madaxa Golaha Amniga Qaranka Iran Ali Larijani ayaa sheegay in tiro ka mid ah askarta Maraykanka la qabtay tan iyo markii uu bilaabmay dagaalka toddobaadkii la soo dhaafay.
Larijani ayaa sheegay in askartaasi la qabtay intii ay socdeen isku dhacyada militari ee u dhexeeya Iran iyo ciidamada Maraykanka ee ku sugan gobolka.
Si kastaba ha ahaatee, mas’uulka Iran ma uusan shaacin tirada saxda ah ee askarta la qabtay, sidoo kalena ma uusan faahfaahin goobta ama xaaladda lagu qabtay askartaasi.
Hadalkan ayaa imanaya xilli ay sii kordhayaan xiisadaha militari ee Bariga Dhexe, iyadoo dhowr weerar oo gantaallo, drones iyo duqeymo ah ay ka dhaceen dalal badan oo gobolka ka tirsan.
Ciidamada Maraykanka ayaa ku sugan saldhigyo milatari oo ku yaalla dalal badan oo Bariga Dhexe ah, oo ay ka mid yihiin Ciraaq, Suuriya iyo dalalka Khaliijka, halkaas oo ay mararka qaarkood bartilmaameed u noqdaan weerarro ay fuliyaan kooxo hubeysan ama ciidamada Iran taageerto.
Ilaa hadda wax war rasmi ah kama soo bixin dowladda Maraykanka oo ku saabsan sheegashada Iran ee ah in askar Maraykan ah la qabtay.
Khubarada siyaasadda iyo amniga ayaa sheegaya in wararkan ay muujinayaan sida ay xiisadaha militari ee u dhexeeya Iran iyo Maraykanka u sii kordhayaan, taas oo kordhin karta khatarta isku dhac ballaaran oo ka dhaca gobolka.
