Maamulka Hotel Elite ayaa maanta shaaciyay in dib loo furi doono hotelka 12-ka Juun 2026, kadib muddo lix maalmood ah oo uu xirnaa, kaddib markii ay la wareegeen ciidamada Dowladda Federaalka Soomaaliya oo halkaasi ka waday howlgallo amni iyo baaritaanno la xiriiray hub sharci-darro ah oo la sheegay in lagu qabtay gudaha hotelka.
War kasoo baxay maamulka hotelka ayaa lagu sheegay in dhammaan howlihii baaritaanka iyo xaqiijinta amniga ee ay wadeen hay’adaha dowladda ay soo dhammaadeen, isla markaana hotelka dib loogu celinayo howlihiisii caadiga ahaa. Maamulka ayaa uga mahadceliyay ciidamada ammaanka wada-shaqeyntii iyo dadaalladii ay ku xaqiijiyeen amniga goobta.
Masuuliyiinta Hotel Elite ayaa sheegay in muddadii uu xirnaa hotelka ay si dhow ula shaqeynayeen hay’adaha ammaanka, isla markaana la qaaday tallaabooyin dheeraad ah oo lagu xoojinayo amniga iyo badqabka martida iyo shaqaalaha hotelka. Waxay sidoo kale xaqiijiyeen in adeegyada hotelka ay si buuxda dib ugu bilaaban doonaan maalinta la qorsheeyay ee furitaanka.
Dib u furitaanka Hotel Elite ayaa kusoo beegmaya xilli ay dowladda Soomaaliya sii waddo howlgalada lagu ururinayo hubka sharci-darrada ah iyo sugidda amniga caasimadda Muqdisho. Ciidamada ammaanka ayaa horay u sheegay in howlgalkii ka dhacay hotelka uu qayb ka ahaa dadaallada lagu baacsanayo hubka sharci-darrada ah iyo kooxaha lagu tuhunsan yahay inay khatar ku yihiin amniga.
Dhanka kale, maamulka hotelka ayaa ugu baaqay macaamiisha, ganacsatada iyo dhammaan dadka adeegyada hotelka isticmaala inay dib ugu soo laabtaan, iyagoo caddeeyay in hotelku diyaar u yahay inuu bixiyo adeegyadiisii caadiga ahaa. Waxay sheegeen in dib u furitaanka hotelka uu muujinayo in xaaladdu ay caadi kusoo laabatay, islamarkaana la xaqiijiyay badqabka goobta iyo shaqadeeda maalinlaha ah.