Madaxweynaha Jubaland, Mudane Axmed Maxamed Islaam, ayaa 29-kii Luulyo 2026 magaalada Kismaayo ku qaabilay wafdi heer sare ah oo uu hoggaaminayay Xildhibaan Ronny Jackson, kaas oo ka koobnaa 11 xildhibaan oo ka tirsan Koongareeska Maraykanka, Ku-simaha Safaaradda Maraykanka ee Soomaaliya Justin Davis iyo masuuliyiin kale.
Kulanka ayaa diiradda lagu saaray xoojinta xiriirka iyo iskaashiga u dhexeeya Jubaland iyo Maraykanka, gaar ahaan dhinacyada amniga, la-dagaallanka argagixisada, dhismaha hay’adaha iyo taageerada horumarineed ee Maraykanku siiyo Soomaaliya.
Masuuliyiinta ka socday Maraykanka ayaa si weyn u bogaadiyey dadaallada joogtada ah ee Jubaland ay sannado badan ku bixisay la-dagaallanka kooxaha argagixisada. Waxay sidoo kale ammaan u jeediyeen Ciidamada Ammaanka Jubaland iyo Kumaandooska Danab ee ka hawlgala Jubaland, kuwaas oo iskaashi la leh AFRICOM, isla markaana fuliyey hawlgallo lagu beegsaday kooxaha argagixisada, kuwaas oo lagu sheegay inay wiiqeen awooddooda.
Jubaland ayaa uga mahadcelisay Maraykanka taageerada uu muddada dheer u fidinayay shacabka Soomaaliyeed, gaar ahaan dhinacyada amniga, tababarrada ciidamada, horumarinta hay’adaha iyo taageerada bani’aadannimo.
Madaxweyne Axmed Maxamed Islaam waxaa kulanka ku weheliyey Xildhibaan Axmed Cabdi Kooshin, Xoghayaha Guddiga Difaaca ee Baarlamaanka 11-aad ee Federaalka Soomaaliya, Xildhibaan Mursal Maxamed Khaliif, Guddoomiyaha Guddiga Saaxiibtinimada Baarlamaanka Soomaaliya iyo Maraykanka, iyo Xildhibaan Cabdirashiid Jire Qalinle, Wakiilka Jubaland ee Golaha Mustaqbalka Soomaaliya.
Kulankan ayaa muujinaya sii xoojinta xiriirka u dhexeeya Maraykanka iyo Jubaland, iyadoo labada dhinac ay adkeeyeen muhiimadda ay leedahay sii wadidda iskaashiga dhinacyada amniga iyo xasilinta Soomaaliya, si loo dardargeliyo dadaallada lagu ciribtirayo argagixisada loona taageero dhismaha hay’adaha.