Madaxweynaha Dowladda Jubaland, Mudane Axmed Maxamed Islaam (Axmed Madoobe), ayaa maanta si rasmi ah u furay Kalfadhiga 2aad ee Golaha Baarlamaanka Dowladda Jubaland, kaas oo ka qabsoomay xarunta Baarlamaanka ee magaalada Kismaayo. Furitaanka kalfadhigan ayaa waxaa goob joog ka ahaa Guddoomiyaha Baarlamaanka Jubaland, xildhibaannada labada gole, xubno ka tirsan Golaha Wasiirrada, saraakiil dowladeed iyo marti sharaf kale.
Madaxweynaha oo khudbad dheer ka jeediyay furitaanka kalfadhiga ayaa adkeeyay muhiimadda uu Baarlamaanku u leeyahay horumarinta dowladnimada, sharci dejinta iyo kor u qaadista isla xisaabtanka hay’adaha dowladda. Waxa uu xusay in kalfadhigan laga filayo in la dardargeliyo ansixinta sharciyo muhiim u ah horumarka, amniga iyo adeegyada bulshada ee Jubaland.
Sidoo kale, Madaxweynaha ayaa Baarlamaanka ku bogaadiyay doorkii ay hore uga qaateen dhismaha hay’adaha dowliga ah, isagoo ugu baaqay xildhibaannada in ay sii xoojiyaan wada shaqeynta u dhaxeysa laamaha kala duwan ee dowladda, isla markaana mudnaan gaar ah siiyaan danaha shacabka.
Dhankooda, Guddoomiyaha Baarlamaanka iyo xildhibaannada ayaa muujiyay diyaar garow buuxa oo ku aaddan howsha hortaalla, iyagoo ballan qaaday in kalfadhigan diiradda lagu saari doono sharciyo taabanaya horumarinta dhaqaalaha, amniga, cadaaladda iyo arrimaha bulshada.