Madaxweynaha Soomaaliya, Xasan Sheekh Maxamuud, ayaa maanta si rasmi ah u furaya shirweynaha 3-aad ee Culimada Soomaaliyeed, kaas oo ay ka qeybgalayaan culimo Soomaaliyeed oo ka kala yimid gudaha dalka iyo qurbaha.
Shirkan oo socon doona muddo afar cisho ah ayaa diiradda lagu saarayaa arrimo muhiim ah oo quseeya xaaladda dalka, sida abaaraha, colaadaha sokeeye, iyo baahida loo qabo midnimo Soomaaliyeed. Inta uu socdo, waxaa la dhageysan doonaa khudbado ay jeedin doonaan Madaxweynaha iyo culimada ka qaybgalaysa.
Shirweynahan waxaa soo qabanqaabisay Wasaaradda Awqaafta iyo Arrimaha Diinta ee Xukuumadda Federaalka, iyadoo la filayo in gunaanadka shirka laga soo saaro warmurtiyeed ka tarjumaya talooyinka iyo go’aannada culimada ee ku aaddan sidii xal waara loogu heli lahaa caqabadaha horyaalla dalka.