Maxkamadda Darajada Koowaad ee magaalada Gaalkacyo ayaa maanta xukun dil ah ku ridday Hodan Maxamuud Diiriye, kaddib markii lagu helay inay si arxan-darro ah u dishay Saabiriin Saylan, gabar 14 jir ahayd. Xukunka ayaa yimid kadib dhageysi labaad oo maxkamaddu u sameysay kiiska.
Isbuucii hore, qareennada difaacayay Hodan ayaa codsaday waqti dheeri ah si ay u dhisaan difaacooda, iyadoo maxkamaddu ay maanta go’aanka kama dambaysta ah ku dhowaaqday. Xeer ilaalinta iyo qareennada difaaca ayaa is dhaafsaday doodihii sharci, ka dibna maxkamaddu waxay ku xukuntay Hodan Maxamuud Diiriye dil toogasho ah.
Sidoo kale, seygeeda Cabdicasiis ayaa lagu xukumay hal sano oo xarig ah iyo ganaax lacageed oo dhan $500, iyadoo lagu helay kaalin uu ku lahaa kiiska.
Dilkii Saabiriin Saylan ayaa si weyn uga gilgishay bulshada, waxaana si ba’an loogu cambaareeyay baraha bulshada kadib markii muuqaal laga duubay dhacdada uu si weyn u faafay.
Arrintaasi waxay dhalisay banaanbaxyo ballaaran iyo baaqyo loo jeediyay hay’adaha garsoorka si caddaalad loo helo.