Ra’iisul Wasaaraha Xukuumadda Federaalka Soomaaliya, Mudane Xamsa Cabdi Barre, ayaa kulan la qaatay Guddiga Madaxa Bannaan ee Doorashooyinka iyo Soohdimaha Qaranka, isagoo ka dhageystay warbixin ku saabsan qorshayaasha guddiga ee hirgelinta doorashooyinka qof iyo cod ah. Ra’iisul Wasaaruhu wuxuu adkeeyay sida ay uga go’an tahay dowladda in awoodda loo celiyo shacabka, si ay codkooda ugu doortaan hoggaankooda. Sidoo kale, wuxuu guddiga kula dardaarmay in ay si degdeg ah uga shaqeeyaan hirgelinta doorashooyinka, maadaama Baarlamaanka uu dhawaan dhammeystiray shuruucdii fududeynayay hawshaas.
Guddiga Madaxa Bannaan ee Doorashooyinka iyo Soohdimaha Qaranka ayaa ah hay’ad dastuuri ah oo mas’uul ka ah maamulidda doorashooyinka heerarka kala duwan ee dalka iyo hirgelinta doorashooyin hufan oo ku saleysan habka qof iyo cod. Golaha Wasiirrada ayaa 26-kii Nofeembar 2024 ansixiyay guddigan, kaas oo ka kooban 18 xubnood. Xubnaha guddiga waxaa ka mid ah:
- Cabdikariim Axmed Xassan
- Saadiq Abshir Garaad
- Avv. Maxamed Cabdiraxmaan Aadan
- Yusuf Cabdiqaadir Maxamed-Baafo
- Cumar Abuukar Cumar
- Farxiyo Maxamed Yusuf
- Dr. Cumar Jamac Maxamed
- Faarax Cabdi Xasan
- Sahro Diiriye Muuse
- Cabdullahi Salaad Yaroow
- Maxamed Amiin Xasan Cabdullahi
- Cabdi Cadow Maxamed
- Cabdishakuur Abiib Haayir
- Khaalid Ibrahim Ismaaciil
- Aamina Sh. Cusmaan Maxamed
- Naasir Maxamed Shire
- Cabdiraxiim Cabdillahi Shaafici
- Maxamed Cumar Ismaciil
Ra’iisul Wasaaraha ayaa sidoo kale sheegay in Xukuumadda DanQaran ay ka go’an tahay in shacabka loo soo celiyo xaqa ay u leeyihiin inay doortaan cidda hoggaamineysa. Guddiga ayaa lagu adkeeyay in ay si hufan oo caddaalad ku saleysan u fuliyaan hawlahooda, si loo xaqiijiyo in doorashooyinka dalka ay noqdaan kuwo lagu kalsoonaan karo.
