Ra’iisul Wasaaraha Xukuumadda Federaalka Soomaaliya, Xamsa Cabdi Barre, iyo wafdi uu hoggaaminayo ayaa maanta u ambabaxay dalka Morocco, kadib casuumaad rasmi ah oo uu ka helay Boqorka dalkaasi.
Ra’iisul Wasaaraha ayaa ka mid ah madaxda ka socota in ka badan 120 dowladood oo ka qeyb galaysa shirweynaha 17aad ee MEdays, kaas oo diiradda lagu saarayo isbeddelka degdegga ah ee siyaasadda caalamka, arrimaha amniga, dhaqaalaha iyo iskaashiga dalalka dunida.
Inta uu joogo Morocco, Ra’iisul Wasaare Xamsa ayaa la kulmi doona madaxda dalkaas iyo qaar kamid ah hoggaamiyeyaasha ka qeybgalaya shirka. Waxa uu sidoo kale ka jeedin doonaa khudbad uu kaga hadlayo xaaladda Soomaaliya iyo doorka ay ku leedahay isbeddellada caalamiga ah.
Shirka ayaa lagu wadaa inuu noqdo madal muhiim ah oo lagu falanqeeyo mustaqbalka iskaashiga caalamiga ah, waxaana ka qeyb galaya wufuud ka kala socda Afrika, Aasiya, Latin America iyo dalal jasiirado ah oo daneeya arrimaha caalamiga ah.