Ra’iisul Wasaaraha Jamhuuriyadda Federaalka Soomaaliya, Hamsa Abdi Barre, ayaa xafiiskiisa ku qaabilay Garsooraha Soomaaliyeed ee heer caalami Omar Abdulkadir Artan, isaga oo kala hadlay horumarkiisa xirfadeed iyo doorkiisa ku aaddan kor u qaadidda magaca garsoorka Soomaaliyeed ee caalamka.
Kulankan ayaa diiradda lagu saaray taageerada dowladda iyo shacabka Soomaaliyeed ay u hayaan Garsoore Omar Artan, oo ka mid ah garsoorayaasha Afrika ee sida weyn loo tixgeliyo, isla markaana ka qeyb galay ciyaaro heer caalami ah oo muhiim ah. Ra’iisul Wasaaruhu wuxuu sheegay in dowladda Soomaaliya ay mar walba garab taagan tahay dadaalka iyo horumarka uu sameynayo Omar Artan, maadaama uu noqday astaan muujinaysa kartida iyo sumcadda dhallinyarada Soomaaliyeed.
Intii kulanka uu socday, Ra’iisul Wasaaruhu wuxuu sidoo kale xusay in inkasta oo uu jiray dib u dhac ku yimid ka qeybgalka garsooraha ee qaar ka mid ah tartamada waaweyn, ay muhiim tahay in la sii wado dadaalka, adkaysiga iyo horumarinta xirfadda, si loo gaaro heerarka ugu sarreeya ee garsoorka caalamiga ah.
Omar Abdulkadir Artan ayaa dhankiisa horay uga dhex muuqday ciyaaro kala duwan oo heer caalami ah, isagoo sumcad wanaagsan ka kasbaday bahda kubadda cagta Afrika iyo meelaha kale ee uu ka shaqeeyo. Waxa uu sidoo kale noqday tusaale dhiirrigelin u ah dhalinyarada Soomaaliyeed ee ku hamiyaya xirfadaha isboortiga, gaar ahaan garsoorka.
Ugu dambeyn, Hamsa Abdi Barre ayaa ku boorriyay garsooraha inuu sii wado dadaalka iyo horumarinta xirfaddiisa, isagoo carrabka ku adkeeyay in guulaha shaqsiyaadka Soomaaliyeed ee caalamka ka soo muuqda ay sare u qaadaan sumcadda dalka iyo rajada jiilka cusub.