Ra’iisul Wasaaraha iyo wafdigiisa waxaa garoonka diyaaradaha si diirran ugu soo dhaweeyay masuuliyiin ka tirsan Dowladda Federaalka Soomaaliya, Madaxweynaha Dowlad-goboleedka Waqooyi Bari Mudane Cabdulqaadir Axmed Aw-Cali (Firdhiye), xubno ka tirsan golayaasha kala duwan ee dowlad-goboleedka, iyo qeybaha kala duwan ee bulshada magaalada Laascaanood.
Booqashada Ra’iisul Wasaaraha ayaa la xiriirta xoojinta wada shaqeynta u dhexeysa Dowladda Federaalka iyo Dowlad-goboleedka Waqooyi Bari, dardargelinta arrimaha amniga, horumarinta adeegyada bulshada, iyo ka dhageysiga baahiyaha ay qabaan shacabka deegaannada SSC-Khaatumo.
Inta uu ku sugan yahay Laascaanood, Ra’iisul Wasaaraha Xukuumadda Federaalka Soomaaliya ayaa la filayaa inuu kulamo la yeesho madaxda dowlad-goboleedka, odayaasha dhaqanka, iyo qeybaha kala duwan ee bulshada, isagoo sidoo kale daah-furi doona mashaariic horumarineed oo ay fulinayso Dowladda Federaalka.