Taliyaha Ciidanka Xoogga Dalka Soomaaliyeed (XDS), Gen. Ibraahim Maxamed Maxamuud, ayaa maanta bannaanka magaalada Jowhar kula hadlay cutubyo ka tirsan Ciidanka Xoogga Dalka Soomaaliyeed, isagoo uga mahadceliyay dadaalka, geesinimada iyo naf-hurnimada ay muujiyeen intii ay ku guda jireen howlgalada amniga.
Taliyaha ayaa si gaar ah u bogaadiyay doorka muhiimka ah ee ciidamada ay ka qaateen sugidda amniga guud iyo furista waddada istiraatiijiga ah ee xiriirisa magaalooyinka Mogadishu iyo Jowhar, taas oo muddooyinkii dambe ay dhibaatooyin amni ka jireen, islamarkaana saameyn ku yeelatay isu socodka shacabka iyo ganacsiga. Wuxuu xusay in dadaalka ciidamada uu si weyn u fududeeyay dhaq-dhaqaaqa bulshada iyo adeegyada aas-aasiga ah.
Gen. Ibraahim Maxamed Maxamuud ayaa ciidamada ku boorriyay inay sii laba jibbaaraan howlaha sugidda amniga iyo xasilinta deegaannada laga xoreeyay kooxaha khalkhalka gelinaya amniga dalka. Wuxuu sidoo kale faray inay si joogto ah uga feejignaadaan falalka lidka ku ah xasiloonida, isla markaana ay sii xoojiyaan wada shaqeynta dhexdooda iyo laamaha kale ee amniga.
Taliyaha ayaa carrabka ku adkeeyay in guulaha la gaaray ay muujinayaan sida ay Ciidanka Xoogga Dalka Soomaaliyeed uga go’an tahay difaaca dalka, la dagaallanka argagixisada, iyo ilaalinta shacabka Soomaaliyeed. Wuxuu tilmaamay in horumarka laga sameeyay goobaha howlgallada uu yahay mid ka dhashay qorsheynta wanaagsan iyo go’aan qaadashada geesinimada leh ee ciidamada.
Ugu dambeyn, Taliyaha Ciidanka XDS ayaa sheegay in guulaha amni ee la gaaray ay si toos ah uga tarjumayaan iskaashiga xooggan ee u dhexeeya ciidamada iyo shacabka Soomaaliyeed, isagoo xusay in taageerada bulshada ay tahay tiir muhiim ah oo lagu gaari karo guul waarta oo dhinaca amniga ah, loona baahan yahay in la sii xoojiyo kalsoonida iyo wada shaqeynta labada dhinac.