Wasaaradda Arrimaha Gudaha, Federaalka iyo Dib-u-heshiisiinta Xukuumadda Federaalka Soomaaliya ayaa si rasmi ah u shaacisay maalinta loo asteeyey qabashada doorashada Guddoonnada Goleyaasha Degmooyinka Gobolka Banaadir, taas oo qeyb ka ah dadaallada lagu xoojinayo hannaanka dowlad-dhiska, maamul-wanaagga iyo horumarinta dowladaha hoose.
War-saxaafadeed ay soo saartay wasaaraddu ayaa lagu sheegay in doorashadan ay ku dhici doonto jadwalka la qorsheeyey, iyadoo la raacayo habraacyada sharciyeed iyo nidaamyada maamulka ee lagu hagayo howlaha goleyaasha degmooyinka. Wasaaraddu waxay xustay in doorashadu ay muhiim u tahay dhammaystirka dhismaha hay’adaha dowladaha hoose iyo kor u qaadista adeegyada loo fidiyo shacabka ku nool degmooyinka Gobolka Banaadir.
Mas’uuliyiinta Wasaaradda Arrimaha Gudaha ayaa tilmaamay in doorashada Guddoonnada Goleyaasha Degmooyinka ay door weyn ka ciyaari doonto xoojinta ka qeybgalka bulshada ee maamulka deegaanka, isla markaana ay horseedi doonto in la helo goleyaal si hufan uga shaqeeya horumarinta degmooyinka iyo wax ka qabashada baahiyaha shacabka.
Sidoo kale, wasaaraddu waxay ugu baaqday dhammaan xubnaha goleyaasha degmooyinka iyo dhinacyada ay khuseyso inay si buuxda uga qeyb qaataan geeddi-socodka doorashada, isla markaana ay ilaaliyaan hufnaanta, daahfurnaanta iyo wadajirka bulshada inta ay socoto doorashadu.
Doorashadan ayaa loo arkaa tallaabo muhiim ah oo lagu xoojinayo nidaamka dowladaha hoose ee dalka, gaar ahaan Gobolka Banaadir oo ah xarunta maamulka iyo siyaasadda Soomaaliya. Dowladda Federaalka ayaa muddooyinkii dambe waday dadaallo lagu horumarinayo maamul-daadejinta iyo kor u qaadista awoodda goleyaasha deegaanka si ay si dhow ugu adeegaan shacabka.
Waxaa la filayaa in marka la doorto Guddoonnada Goleyaasha Degmooyinka ay si rasmi ah u bilaabmaan wajiyo cusub oo la xiriira qorsheynta horumarinta degmooyinka, kor u qaadista adeegyada bulshada iyo xoojinta xiriirka ka dhexeeya maamulka deegaanka iyo shacabka.