Cabdullaahi Sheekh Ismaaciil (Fartaag), Wasiirka Wasaaradda Amniga Gudaha ee Xukuumadda Federaalka Soomaaliya, ayaa galabta si rasmi ah u soo xiray tababar muhiim ah oo loo soo gabagabeeyay 120 askari oo ka tirsan Ciidanka Booliska Soomaaliyeed, gaar ahaan Cutubka Daraawiishta Booliska.
Munaasabadda xiritaanka oo si heer sare ah loo soo agaasimay ayaa waxaa ka qeyb galay saraakiil sare oo ka tirsan hay’adaha amniga, tababarayaal, iyo marti sharaf kale. Intii ay socotay munaasabadda, askarta qalin-jabisay ayaa soo bandhigay xirfado iyo tababaro kala duwan oo ay barteen muddadii uu tababarku socday, kuwaas oo ay ka mid ahaayeen farsamooyinka ilaalinta amniga, ka hortagga dambiyada, iyo maaraynta xaaladaha degdegga ah.
Wasiirka ayaa khudbad uu halkaasi ka jeediyay ku bogaadiyey askarta cusub dadaalka iyo kartida ay muujiyeen, isaga oo ku dhiirrigeliyay inay si daacadnimo, hufnaan, iyo waddaniyad leh ugu adeegaan dalkooda iyo dadkooda. Wuxuu xusay in tababarkan uu yahay mid ka mid ah dadaallada joogtada ah ee lagu xoojinayo awoodda iyo tayada ciidamada booliska, si ay ula jaanqaadaan caqabadaha amni ee jira.
Sidoo kale, wasiirku waxa uu carrabka ku adkeeyay in Dowladda Federaalka Soomaaliya ay si weyn uga go’an tahay dib-u-dhiska iyo casriyeynta hay’adaha amniga, gaar ahaan Ciidanka Booliska Soomaaliyeed, si ay u noqdaan kuwo leh xirfad, anshax, iyo karti ay ku sugi karaan nabadda iyo kala dambeynta dalka.
Ugu dambeyn, wuxuu ugu baaqay askarta qalin-jabisay inay ka faa’iideystaan aqoonta iyo xirfadaha ay heleen, isla markaana ay si joogto ah u horumariyaan naftooda, si ay uga qeyb qaataan dhismaha dal nabdoon oo horumarsan. Tababarkan ayaa la filayaa inuu door muuqda ka qaato xoojinta amniga guud ee dalka iyo kalsoonida shacabka ay ku qabaan hay’adaha ammaanka.