Wasiirka Wasaaradda Arrimaha Dibadda iyo Iskaashiga Caalamiga ah ee Jamhuuriyadda Federaalka Soomaaliya, ayaa maanta xafiiskiisa ku qaabilay Danjiraha cusub ee Jamhuuriyadda Jabuuti u fadhiya Soomaaliya, Col. Cismaan Dhoobad Suugoole, isaga oo si rasmi ah uga guddoomay waraaqaha aqoonsiga diblomaasiyadeed. Munaasabaddan ayaa muujinaysa bilowga howlaha diblomaasiyadeed ee danjiraha cusub uu ka fulin doono Soomaaliya, iyadoo sidoo kale astaan u ah xiriirka qotoda dheer iyo iskaashiga taariikhiga ah ee ka dhexeeya labada dal ee walaalaha ah.
Kadib munaasabadda guddoonka waraaqaha aqoonsiga, Wasiirka iyo Danjiraha cusub ayaa yeeshay kulan heer sare ah oo looga hadlay arrimo badan oo muhiim u ah labada dowladood. Intii uu socday kulanka, labada dhinac waxay si qoto dheer uga wada hadleen xoojinta xiriirka walaaltinimo, iskaashiga siyaasadeed, amniga, dhaqaalaha, iyo horumarinta danaha wadajirka ah ee ay wadaagaan Soomaaliya iyo Jabuuti. Waxa kale oo ay isla soo qaadeen muhiimadda ay leedahay in labada dal ay sii laba jibbaaraan wada shaqeynta dhinacyada ganacsiga, isku socodka shacabka, iyo isdhaafsiga khibradaha dowladda iyo hay’adaha kala duwan.
Wasiirka Arrimaha Dibadda Soomaaliya ayaa danjiraha cusub ku bogaadiyey magacaabistiisa, isaga oo carrabka ku adkeeyey doorka muhiimka ah ee ay Jabuuti ka qaadato nabadda, dib u dhiska, iyo taageerada joogtada ah ee Soomaaliya. Wasiirku wuxuu sheegay in dowladda Soomaaliya ay ka go’an tahay sii xoojinta xiriirka istiraatiijiga ah ee kala dhexeeya Jabuuti, gaar ahaan dhinacyada amniga gobolka, la dagaallanka argagixisada, iyo horumarinta xasilloonida Geeska Afrika.
Dhinaciisa, Danjire Col. Cismaan Dhoobad Suugoole ayaa uga mahadceliyey Wasiirka iyo dowladda Soomaaliya soo dhoweynta diirran ee loo sameeyey, isaga oo xaqiijiyey in dowladda Jabuuti ay sii wadi doonto taageerada ay la garab taagan tahay Soomaaliya. Danjiruhu wuxuu tilmaamay in labada dal ay wadaagaan xiriir qoto dheer oo ku saleysan walaaltinimo, dhaqan, diin, iyo dano siyaasadeed oo mideysan, kuwaas oo muhiim u ah horumarka iyo xasilloonida gobolka.
Kulankan ayaa kusoo dhammaaday jawi is afgarad iyo saaxiibtinimo leh, iyadoo labada dhinac ay ku heshiiyeen in la xoojiyo wada shaqeynta iyo xiriirka diblomaasiyadeed si loo gaaro horumar waara iyo nabad ka hanaqaadda gobolka Geeska Afrika.