Wasiirka wasaaradda gaashaandhigga Soomaaliya Xasan Cali Maxamed (Amardambe) ayaa ku qaabilay xafiiskiisa wasaaradda gaashaandhigga xubno uu hoggaaminayay wakiilka gaarka ah ee guddoomiyaha guddiga Midowga Afrika ee Soomaaliya, Danjire Francisco Madeira
Labada dhinac ayaa waxa ay ka wada hadleen sidii loo dardar gelin lahaa hawlgalka ka dhanka ah ururka Al Shabaab ee ka socda gobolada dalka iyo sidii loo xoojin lahaa taageerada AMISOM ay siiso ciidanka qaranka.
Danjire Francisco Madeira ayaa ku amaanay dowladda federalka Soomaaliya gaar ahaan wasaaradda gaashaandhigga sida ay uga go’an tahay xoreynta goobaha ay ku sugan yihiin Al Shabaab.
“Waa talaabo wanaagsan oo horey loo qaaday hawlgalka ka socda labada Shabeelle, Gedo, Baay iyo Bakool ee lagu xoreeyay degaano badan oo dadka ay ku dhibaateyn jireen Al Shabaab”. ayuu yiri Danjire Francisco Madeira.
Dhanka kale wasiirka wasaaradda gaashaandhigga Soomaaliya ayaa sheegay in ciidamada xoogga dalka ay u diyaar garoobeen qorshaha kala guurka ee ciidamada AMISOM.