Wasiirka Gaashaandhigga Xukuumadda Federaalka Soomaaliya, Mudane Axmed Macallin Fiqi, ayaa maanta xafiiskiisa ku qaabilay Safiirka Boqortooyada Ingiriiska u fadhiya Soomaaliya, Danjire Charles King.
Kulanka oo ahaa mid muhiim ah ayaa labada dhinac waxay kaga wada hadleen xiriirka iyo iskaashiga u dhexeeya Soomaaliya iyo Boqortooyada Ingiriiska, gaar ahaan dhinacyada amniga, difaaca, tababarka ciidamada iyo taageerada la siiyo hay’adaha amniga ee Soomaaliya.
Wasiir Axmed Macallin Fiqi ayaa kulanka uga hadlay xaaladda guud ee amniga dalka iyo dadaallada ay Dowladda Federaalka Soomaaliya ku bixinayso xoojinta ciidamada qalabka sida, si ay u yeeshaan awood ku filan oo ay ugu gudan karaan waajibaadkooda dastuuriga ah ee difaaca dalka iyo ilaalinta shacabka Soomaaliyeed.
Sidoo kale, Wasiirka ayaa la wadaagay Safiirka UK qorshayaasha Wasaaradda Gaashaandhigga ee ku aaddan dib-u-dhiska iyo tayeynta Ciidanka Xoogga Dalka Soomaaliyeed, iyadoo xoogga la saarayo kor u qaadista tababarka, tayada ciidanka, hannaanka hoggaamineed iyo qalabaynta ciidamada.
Dhinaca kale, waxaa kulanka looga hadlay dagaalka ka dhanka ah kooxda Al-Shabaab iyo howlgallada ay ciidamada Soomaaliyeed ka wadaan deegaano ka tirsan dalka. Labada dhinac ayaa isla eegay muhiimadda ay leedahay in la xoojiyo iskaashiga caalamiga ah ee Soomaaliya loogu taageerayo dadaallada lagu xaqiijinayo amniga iyo xasilloonida dalka.
Wasiir Axmed Fiqi ayaa dowladda Boqortooyada Ingiriiska uga mahadceliyay taageerada ay Soomaaliya ka siiso dhinacyada amniga iyo dhismaha hay’adaha dowladda, isagoo tilmaamay in iskaashiga caalamiga ah uu muhiim u yahay dadaallada lagu dhisayo ciidan Soomaaliyeed oo awood u leh in uu si buuxda ula wareego mas’uuliyadda amniga dalka.
Safiirka Boqortooyada Ingiriiska ee Soomaaliya, Danjire Charles King, ayaa dhankiisa muujiyay sida ay dowladda UK uga go’an tahay sii wadidda taageerada iyo iskaashiga ay la leedahay Dowladda Federaalka Soomaaliya.
Danjiraha ayaa sidoo kale bogaadiyay dadaallada dowladda Soomaaliya ay ku horumarineyso hay’adaha amniga iyo difaaca, isagoo xusay muhiimadda ay leedahay in labada dal ay sii xoojiyaan wada-shaqeynta iyo is-dhaafsiga khibradaha.
Kulanka ayaa kusoo dhammaaday is-afgarad ku aaddan sii xoojinta xiriirka iyo wada-shaqeynta Soomaaliya iyo Boqortooyada Ingiriiska, gaar ahaan dhinacyada amniga, difaaca iyo horumarinta awoodda ciidamada Soomaaliyeed.
Labada dhinac ayaa sidoo kale isku raacay in la sii wado kulamada iyo wada-tashiyada joogtada ah ee lagu xoojinayo iskaashiga labada dal, si loo taageero dadaallada Soomaaliya ay ugu jirto xaqiijinta nabadgelyada, xasilloonida iyo horumarka dalka.